W. G. Sebald: Austerlitz

Igela argitaletxearen eskutik, W. G. Sebald idazlearen 'Austerlitz' eleberriaren itzulpena aurkeztera doa Berlingo Euskal Etxea, apirilaren 29a -ostirala-, arratsaldeko 19:30etan Mitteko Club der polnischen Versager aretoan.

Ez dira gutxi Austerlitz azken hamarkadetako literaturaren ale gorenen artean ipintzen duten kritikariak. Nobela euskaraz irakurri ahal izatea mugarria da. Hain lan konplexuari heldu dion Idoia Santamaría itzulpen prozesuari buruz ariko da.

Uwe Schütte Sebalden obraren inguruko aditu handiena da, eta zorioneko gara Igela eta Euskal Etxearen gonbidapenari baiezkoa eman izanaz. Liburuaren azalaren egileak, Berlinen bizi den Alain Urrutia artista bilbotarrak, eta Lander Majuelo Igela argitaletxeko editoreak ere parte hartuko dute solasaldian.

Sarrera doakoa da, eta ondoren elkarrekin ardoa edanez hitz eta pitz aritzeko parada izanen da.

Gernika: 85 urte

Gerrak Sebalden obra zeharkatzen du: bere obra memoriari buruzko ezinbesteko erreferentziatzat jo ohi da. Horregatik, esanahi berezia du guretzat ekitaldi hau asteburu honetantxe ospatzeak.

Austerlitz ostiral gauez aurkeztu, eta Gernikako bonbardaketa gogoratzeko urteroko ekitaldia deitu du Berlingo Euskal Etxeak biharamunean, apirilaren 30ean. 85 urte beteko dira aurten Alemaniako Legion Condorrek eta Italiako Aviazione Legionariak Gernikako sarraskia burutu zutenetik.

Betiko moduan, Zehlendorf auzoko Guernicaplatzen izango da hitzordua, 16:00etan. Wolfgang Borchert autorearen poema antimilitarista bat irakurriko da ekitaldian, eta biktimei loreak eskainiko zaizkie.

Kontaktua

Aurreko ekitaldiak

Kontzertua: La Rekba, Tatxers eta Txakurrak

Apirilaren 8an, Euskal Herritik bidaiatutako hiru taldek kontzertua eskaini zuten K-19 aretoan. Euskarazko zuzeneko musika itzuli da behingoz Berlinera, eta irrika zegoen: izan ere, jendez gainezka zegoen K-19, eta giroa apartekoa izan zen...

22. Korrika

Hiru urteko geldialdiaren ondoren, Korrika Berlinera ere itzuli da 2022ko apirilean. Seigarrenez ospatu du Euskal Etxeak lasterketaldia Alemaniako hiriburuan: aurten, Kreuzbergen hasi, eta Oberbaumbrücke zubia igarota Friedrichshain auzoko Boxhagener Platz izan du jomuga.

Ikusi

Poesia emanaldia: 'Sua'

Martxoaren 25ean, Sua izeneko poesia erotiko irakurtaldiaz gozatzeko parada izan genuen, Euskararen Egunaren harira. Euskal poeten lan hautatuak irakurriko ziren Friedrichshaingo K19-an, giro atseginean eta musikak lagunduta

Kontzertua: 'Crossing borders'

Herrialdeen eta generoen mugak lauso bilakatu zituen emanaldia. Katalina Erausoren bizitza gogora ekarri zuen errepertorio aberatsa eskaini zuen musikari eta abeslari talde batek,  Kühlhaus aretoan.

Ikusi

Irakurketa: 'Neguko argiak'

Aspalditik Berlinen bizi den Irati Elorrieta idazlearen eleberria aitzakia hartuta emanaldia antolatu zuen  Euskal Etxeak. Hiriburuko euskara ikasle alemanek 2019ko Euskadi Literatura Saria irabazi zuen obraren pasarteak irakurri zituzten.

Ikusi